FCAA 2023 leh Mizoram

Mite hriat anga thukin hre lo mah ila, kan thlirna tlang atanga kan lo hmuh ve dan i han ziak ve teh ang.

Mizoram Legislative Assembly chuan Forest Conservation Amendment Act 2023 chu a adopt fel ta a. House ah opposition lam te’n pass rih loh rawt mahse pass a ni ta tho.

He dan kan adopt tak hi tunlai Mizoram thukhel lian ber, pawl hrang hrangte inhnialna topic lian ber a ni leh mek. Ka thlirna atanga kan lo ngaih ve dan mawlmang tak ka han thailang ve dawn ang e.

Assembly House a an sawihona te ka lo thlir a, Forest Minister in adopt na tur resolution a rawn pu lut a, pass a tulna te sawiin, Forest Conservation Act, 1980 avanga development a muan thin dan te an sawi. Opposition lamin zirchianna hun a awm loh thu sawiin pass rih loh an rawt a. Kum 2023 a lungrual taka adopt loh an pawm tlan tawh hnu, rawn put luh a ni leh chu ‘central lam tlawnna’ a ni thei em tih an sawi. Opposition lam atangin mi pathumin sawiin, an thuken a inang tlang a. Ruling lam atangin House Leader tih loh chuan a sawi lem lo.

House Leader, CM Lalduhoma chuan 2023 a sawrkar khan adopt duhlohna resolution kha central lama thawn thlak a nih bik loh thu leh, khatih lai sawrkar khan adopt duh lo ni se chuan buaipui chhunzawmna hun a awm thu a rawn sawi.

2023 a sawrkar MNF leh tuna kan sawrkar hrawn mek ZPM te hian central lam tlawnna’n an adopt lo ngam lo a ni thei ang em? tih hi a ni.

Forest Conservation Act, 1980 khan forest kan tih hi a huam zau em em mai a. Chu chuan hmasawnna kal tur timuang thin a ni. Chuti ang buaina case lian tak Mizoram-a kan neih pakhat chu NIT ram, Lengpui a mi hi, campus sak mai theih loh a kum 10 chuang zet awm tawh hi a ni awm e.

Forest Conservation Amendment Act 2023 hian tulna chin a nei a, development atan a hnawk thin tih bakah, national security thuamthatna atan a tul a ni tih ni. India rampum thlir chuan hlauh tur thil a ni kher awm lo ve. Chutih rual chuan, keini Mizoram, International border ngah tak leh 80% chuang zet forest area in a la khuh tan chuan hlauh phawt hi kan tih tur zawk a ni in a lang.

FCAA 2023 hian international border atanga boruak a teh a 100KM chhung hi development atan leh national security atan central sawrkar chuan a duh duhin a hmang thei ang tih a ni a. Mizoram area hi han teh ila, FCAA in a sawi hi chuan Mizoram pum pui mai hi a huap vek dawn tihna a nih chu.

Ngaihtuahna fim tak hmang tan chuan a him thei dawn em ni le? ‘Hlauh kan ngah lutuk’ ti pawl an awm a. Keini tribal te himna chu hlauh kan ngah hi a ni tih kan hriat a tha.

Kei zawng, ka ngaihtuah chian poh leh he act adopt duhna chhan hi thil dang a awm theiin ka hre lo – ‘central sawrkar tlawnna’ a ni ber mai e.